Os populares consideran que revisando a tempo as zonas a rozar e planificando debidamente o traballo, o goberno local non se vería na necesidade de acometer as rozas na semana previa á festa de cada pobo
Lourenzá, 24 de agosto de 2022. O Partido Popular de Lourenzá lamenta que, unha vez máis, a falta de previsión e planificación polo goberno municipal presidido pola socialista Rocío López xere problemas aos veciños e supoña un incremento de custos ao Concello. Os populares refírense esta vez á campaña de roza que leva a cabo o Concello, mediante a contratación deste servizo, a pesar de que dispón de maquinaria para acometer estes traballos.
O PP de Lourenzá pregúntase por que tendo o Concello as ferramentas e os traballadores necesarios para levar a cabo a campaña de roza é necesario recorrer a contratación de empresas externas para facer este labor.
Os populares destacan que, desta maneira, os veciños teñen que pagar, por un lado, a maquinaria que se mercou para facer os desbroces e, por outro, pagar a empresas para que fagan ese traballo.
No PP din que a explicación, a resposta as preguntas expostas, está na mala planificación do traballo. Os populares consideran que é mellor revisar as distintas zonas e planificar as rozas con tempo, para non verse na necesidade de facelo a semana previa ás festas patronais.