“O ensino público é unha prioridade para o noso grupo de goberno, por iso a nosa colaboración e a implicación cos centros é constante, e quero aproveitar o primeiro día de clase para agradecer o traballo da comunidade educativa de Viveiro”, asegura a alcaldesa, María Loureiro.
Entre os servizos xestionados polo concello, destaca o de Madrugadores na Escola de Educación Infantil San Roque e no CEIP de Celeiro, os centros onde os pais e nais o demandaron. O concello aporta persoal municipal e os alimentos para os nenos e nenas, facilitando a conciliación da vida familiar e laboral.
Son ademais de competencia municipal os servizos de limpeza e conserxería dos centros educativos. O concello asume tamén nos IES os custos de enerxía, mantemento das caldeiras ou xardinería, entre outros.
A colaboración cos centros abarca outras actividades, como a cesión das instalacións municipais para actividades de ocio e lecer, ou dos autobuses para visitas escolares e viaxes fin de curso.
“Os concellos asumimos en moitas ocasións competencias impropias en materia educativa, como pasou durante a pandemia, pero queremos que os nosos nenos e nenas reciban a súa formación nas mellores condicións posibles”, engade Loureiro.