Castiñeira insistiu en que “o PP está orgulloso da rede de residencias da Deputación de Lugo”, pero advertiu que “hai cousas que non están ben e o noso deber é dicir o que hai que mellorar”
Así o manifestou durante o debate sobre a aprobación da terceira addenda do convenio entre a Deputación e o Concello da Pontenova, de data 21 de febreiro de 2018, en relación á dirección de execución da obra de construción de centro de atención a persoas maiores no municipio que saíu adiante por unanimidade.
Castiñeira remarcou que “as únicas residencias que abriu este equipo de goberno do señor Tomé -tendo en conta que abrir non é o mesmo que inaugurar como son moi dados a facer- son as que fixeron outros. É o caso das que fixo Suplusa, esa entidade á que lle chaman chiringuito e que vostedes pecharon, pero que funcionaba mellor que vostedes”.
Numerosos atrasos
Sobre a residencia da Pontenova, os populares cren que “o goberno de Tomé pouco pode presumir se dende febreiro do 2018 non se deron conta de que non tiñan previsto o diñeiro para a dirección de obra e traen aínda hoxe a pleno esa terceira addenda para suplementar”.
“Este é só un exemplo”, dixo o voceiro popular que citou outros coma o de Guitiriz de onde había veciños asistindo ao pleno. O convenio foi firmado no 2011, acumula anos de atraso e, o peor de todo é que, está sen facer a residencia e a Casa da Botica, que é un ben inventariado, no chan. Non sabemos nada da residencia. Non cumpre nin cos seus alcaldes”.
“Catro anos despois de firmar o convenio da residencia de Portomarín e dúas renuncias das construtoras -que xa lle advertira o Grupo Popular que tiña que revisar os prezos da construción porque ía pasar o que está pasando-, din agora que hai que cambiar de modelo que supón novos atrasos”, engadiu.
Tamén houbo problemas coa construtora na Pobra do Brollón para a que o convenio está asinado dende o 2018; pero, despois de varios anuncios de inicio da obra e cun macrocartel xigante incluído, está paralizada”.
Castiñeira nomeou tamén o caso de Cervantes onde prometeron a residencia antes das eleccións, asinaron o convenio no 2019, pero non hai nada e os veciños están preocupados porque nin saben onde se vai ubicar. En Navia e Ribas de Sil están construída, pero pechada. A residencia de Becerreá non ten cociña nin transformador e, polo tanto, non funciona. Pasan as herbas por riba dela. Da de Ourol non sabemos nada; no Courel e en Ferreira de Pantón, dende que se firmaron os convenios no 2018 e no 2021, non hai un ladrillo posto”.
“Nas residencias que están feitas -porque llas fixeron- coma Castroverde ou Meira, non funciona o centro de día a pesar das demandas dos veciños e as nosas reclamacións”. O popular explica que “non cumpre cos alcaldes do PSOE” e, polo tanto, dubida que “cumpra cos Concellos que leva achicando estes 3 anos”.
O popular aportou algunhas cifras: “a Deputación a día de hoxe está dando servizo a 232 usuarios; mentres que a Xunta dispón de 1600 prazas entre residencias propias e prazas concertadas máis centos de libranzas en centros municipais e da Deputación”. De feito, “87 usuarios reciben libranzas da Xunta para custear a residencia da Deputación o que supón 54.000 euros ao mes. Os Concellos pagan 2,5 millóns de euros ao ano e a Deputación preto de 3. É dicir, dirixe un 3% do orzamento a atender ao 2% da poboación maior de 65 anos”.
Castiñeira insistiu durante o debate que “o PP está orgulloso da rede de residencias da Deputación de Lugo”, pero advertiu que “hai cousas que non están ben. O goberno provincial ten que saber que, como oposición, estamos fiscalizando a súa xestión e que lle diremos as cousas que hai que mellorar”.
Falta de respecto de Tomé
Por outra banda, o popular afeou ao presidente da Deputación “a falta de respecto que supón chamarme profesional da mentira”. Castiñeira sinala que se debe a que “debe ter orde de insultar ao contrario”, pero cre que “no debate o presidente debería ter outra cara diferente”.