A iniciativa enmárcase no deseño do plan municipal para implantar os Obxectivos de Desenvolvemento Sostible (ODS)
Entre esas actividades, promóvese un concurso de debuxo infantil ‘O meu concello e os ODS’, dirixido aos nenos e nenas de Educación Primaria matriculados nun centro educativo de Viveiro.
A rapazada deberá realizar un debuxo tamaño folio, ou máis pequeno, e escribir o seu nome, curso colexio e datos de contacto no reverso da folla. O debuxo pode depositarse no centro educativo ata o próximo 25 de outubro.
A iniciativa busca sensibilizar e implicar á poboación do municipio sobre a importancia da implantación da Axenda 2030 desde o nivel local a través dun concurso de debuxos relacionados cos ODS entre os/as escolares da vila.
O xurado valorará a orixinalidade e creatividade do debuxo, a súa vinculación coa Axenda 2030 e os ODS, a introdución de elementos locais propios do Concello, a aparición de elementos medioambientais e sociais no debuxo, así como a calidade artística e creativa do debuxo.
Outorgarase un premio para os cursos 1º a 3º e outro premio para os cursos de 4º a 6º. Os premios consistirán en dous vales valorados en 30 euros cada un para a compra de material escolar nun comercio local do teu concello.
A Axenda 2030 está concibida como unha estratexia global para traballar conxuntamente a través dos 17 obxectivos (os 17 ODS) no camiño do desenvolvemento sostible. Malia a súa ambición global, trátase en esencia dunha axenda centrada na actuación local, empregando as institucións máis próximas á sociedade para poder executar accións que teñan un impacto directo no día a día das persoas e a contorna.