En cada concello o correspondente concreto fai a súa entrevista e logo emítense xuntas, acompañadas dunha parte humorística, na que Dorinda e Venancio, dous mariñáns máis, comentan as entrevistas e os personaxes que nelas saen. Entre entrevistas de xente famosa (como a do atleta olímpico Adrián Ben, o xornalista Gonzo, o bispo da diócese de Mondoñedo Ferrol, Fernando García Cadiñanos, etc.) saen outras entrevistas de xente anónima, aínda que non por iso menos interesantes, como a que se lle fixo a María do Porrollo, unha anciá de 106 anos que vive en Riotorto, ou a entrevista conxunta aos usuarios da residencia de anciáns San Bartolomeu de Xove. Deporte, música, cultura, economía, política… todo ten cabida no programa e dunha forma sempre amable e con bo humor.
É unha forma de poñer en valor o diálogo entre a xente, a convivencia, a proximidade afectiva dos habitantes da nosa comarca e o labor cultural e radiofónico de xente anónima (non profesional) que ama a radio e a comunicación. Entre os reporteiros hai antigos policías, empresarios, membros de corais, perruqueiros, farmacéuticos, gardarríos, xubilados, avogados, animadores culturais, cantantes, etc. Todo un conglomerado de xentes unidad por un mesmo sentir radiofónico e comarcal. Para celebrar o aniversario, xuntáronse todos na Casa da Roxa, en Vilaronte (Foz) este pasado venres, día 9 de decembro. Vai un ano e todos se senten animados a que se xunten moitos anos máis.