Impártense especialidades con boa saída laboral, como as relacionadas coas enerxías renovables, atención sociosanitaria, socorrismo, construción ou hostalería
O delegado territorial da Administración autonómica, Javier Arias, explica que a Xunta ampliou o crédito da última convocatoria, o que permite incrementar o número de cursos financiados en Lugo. A resolución inicial xa contemplaba 196 accións formativas para impartir en toda a provincia no período 2022-2023, con 2.940 prazas e un investimento de 8,4 millóns de euros.
Deste xeito, en global, tras a ampliación do crédito, impartiranse cun orzamento de 11,3 millóns de euros, un total de 274 cursos nos que se poderán formar un máximo de 4.110 alumnas e alumnos.
En canto ás novas actividades que veñen de ser concedidas, 59 desenvolveranse na comarca de Lugo, 15 na Mariña e catro na Terra Chá. Dan acceso a certificados de profesionalidade e abranguen especialidades con boa saída laboral, como as relacionadas coas enerxías renovables, atención sociosanitaria, socorrismo, construción ou hostalería. Tamén competencias en Matemáticas, Lingua Castelá, Lingua Galega e Inglés.
Serán impartidos por 15 empresas, un Concello -neste caso o do Valadouro – e dúas entidades: a Fundación Laboral da Construción e a Asociación Provincial de Empresarios de Hostalería e Turismo de Lugo (Apehl).
Para participar son colectivo prioritario as persoas afectadas por ERTE, así como as galegas e galegos con discapacidade física, psíquica ou sensorial. Poden tomar parte nestas accións -cun tope do 30% de participación- persoas traballadoras ocupadas sempre que as prazas non se cubran con desempregados.
As persoas interesadas en consultar os cursos impartidos ao abeiro dos diferentes programas da Xunta poden obter toda a información, lugares e datas a través da páxina web emprego.xunta.gal, no apartado Buscador de Formación.