Esperanza celebrará unha asamblea de asociados para explicar o traballo realizado en 2022

O número de socios aumentou hasta os 435 no ano pasado

Burela, 27 de xaneiro de 2023. A Asociación Esperanza de loita e apoio contra o cancro está a elaborar a memoria de actividades realizadas durante o ano 2022. Na memoria de actividades incluiranse tanto aquelas realizadas a pé de rúa e en contacto directo coa sociedade burelá como as recadacións acadadas en distintos eventos e os donativos efectuados, en cumprimento do obxectivo fundacional do colectivo, que é aportación de recursos para axudar á investigación para a prevención, diagnose e tratamento do cancro, e a axuda ás persoas e familias, asociadas ou non, afectadas pola enfermidade.

Unha vez lista a memoria de actividades, a directiva do colectivo convocará unha asamblea de asociados para explicarlles con detenemento o contido da mesma. Entre as actividades realizadas en contacto coa cidadanía, destacan a realizada coa axuda da Fundación ALCOA nos dous ceips da localidade, e os cursiños de pilates e costura, e as actividades que se realizaron no Día de Loita contra o cancro.

INCREMENTO DE ASOCIADOS

Esperanza incrementou o número de asociados en 2022 ata os 435, uns 60 máis ca en 2021, o que para a directiva representa un maior grao de sensibilización e compromisoda veciñanza burelá na loita contra o cancro e todo o que representa. A directiva da entidade quere transmitirlle a toda a súa masa social, pero tamén a toda a sociedade burelesa, o seu fondo agradecemento pola colaboración que están a ter.