Belén do Campo fai fincapé na importancia de combinar o uso e desfrute desta contorna coa súa preservación e lembra a obrigatoriedade de cumprir a normativa de uso público establecida para este monumento natural
Logo de explicar que nesta ocasión non se precisa autorización previa para acceder ao areal, Do Campo fixo fincapé na importancia de combinar o uso e desfrute desta contorna coa súa preservación e, nesa liña, lembrou a obrigatoriedade de cumprir a normativa de uso público establecida para este monumento natural.
Os visitantes non poderán ir por fóra dos camiños, sendeiros, miradoiros e áreas de descanso; recoller especies de fauna e flora; tirar cabichas e lixo fóra dos lugares habilitados para tal fin, nin realizar escalada ou actividades similares.
Durante a ponte do 1º de maio do ano pasado visitaron este espazo protexido arredor de 3.750 persoas. Dado que este ano a ponte festiva inclúe un día máis, a previsión é que se poden superar os 5.000 visitantes.
Cómpre lembrar que o plan de conservación deste monumento natural inclúe limitacións de acceso a este espazo protexido durante períodos de alta afluencia. Durante a Semana Santa e os meses de xullo, agosto setembro só poden acceder a este espazo protexido un máximo de 4.812 persoas cada xornada, co fin de facer compatible o uso público coa preservación dos valores ambientais que motivaron a súa declaración como Monumento Natural.
Neses períodos, as entradas poden reservarse, de xeito totalmente gratuíto, na páxina web habilitada a tal efecto ou a través de diferentes entidades públicas e privadas autorizadas para distribuílas, como o Clúster de Turismo, a Mancomunidade de Municipios da Mariña, establecementos hoteleiros, os taxistas de Ribadeo e outros operadores de transporte colectivo.
A Praia das Catedrais é un dos tres monumentos naturais que se localizan na provincia de Lugo, onde tamén teñen esa consideración o Souto da Retorta (Viveiro) e o pregamento xeolóxico de Campozola-Leixazós (Quiroga).