O concelleiro de Desenvolvemento Local, Pablo Vizoso, contou que “desde o pasado venres, día 21 de abril, que é cando o Concello o publicou está aberto o prazo para optar ou para solicitar un dos postos da praza de abastos, que saen a concesión durante un período de 30 anos”.
O edil ribadense dixo que “son catro os lotes que se ofertan e deberán estar destinados a algunha das seguintes actividades: postos especiais ou florería, peixería, alimentación en xeral ou froitas e hortalizas e tamén panadería. A superficie deste postos varía individualmente entre os 13 e os 28 metros cadrados”.
Vizoso Galdo explicou que “dentro da categoría de postos especiais entendemos aqueles que comercialicen produtos coma viños, licores, pastas, produtos gourmet, ecolóxicos e de proximidade, embutidos ou encurtidos. En peixería inclúe a venda de peixe e marisco fresco e conxelado e tamén mariscos cocidos. Dentro da categoría de florería entendemos a venda de flores e plantas frescas, venda de flores secas e variedade de centros decorativos e ornamentais. E no tocante á panadería comprende a venda de produtos de pan e derivados da fariña así como de pastelería e repostería”.
O concelleiro de Desenvolvemento local indicou que “a forma de licitación será a poxa á alza e o canon de saída varía entre os 374 euros e os 815 euros, dependendo do lote ao que se opte. Para o establecemento das diferentes categorías dos postos en licitación, ademais de ter conta a propia ordenanza procurouse a diversificación das actividades que xa están asentadas na praza, sempre co fin de potenciar este espazo coma un dos epicentros de compra de produtos de proximidade e dunha alimentación de calidade en Ribadeo. Outra das cuestións que buscamos é facilitar e promover o auto emprego, xa que se trata dun emprendemento que consideramos posible, no sentido que non precisa inversións iniciais que se precisan ou os alugueiros posteriores non teñen porque ser precisamente altos”.
Pablo Vizoso engadiu que “deste xeito aplicando a ordenanza neste ámbito do Concello resulta que estaríamos falando duns alugueiros anuais entre 460 e pouco máis de 1.000 euros ao ano. O prazo para a solicitude a calquera destes postos estará aberto 30 días. O anuncio de licitación pódese consultarse na sede electrónica do Concello de Ribadeo e os pregos administrativos e técnicos tamén podemos consultalos na plataforma de contratación do Sector Público no perfil do contratante do Concello de Ribadeo”.