Podemos Viveiro, ao carón das traballadoras e dos traballadores, con motivo da conmemoración do Día do traballo

Viveiro, 2 de maio de 2023. O candidato á alcaldía de Podemos Viveiro, Roberto Yáñez, e parte do seu equipo apoiaron este luns, coa súa presenza, a homenaxe que todos os primeiros de maio se lle rende ás numerosas persoas que no seu día loitaron, e a aquelas que continúan a pelexar, por conseguir unha vida digna dos e das traballadoras.

Desde a formación morada sempre se defenderon os intereses da clase traballadora, como amosan os numerosos logros acadados por Unidas Podemos no Goberno de Coalición: a suba do Salario Mínimo Interprofesional en catro anos desde os 900 ata os 1.080 euros —un 20% porcentual—; a reforma laboral liderada polas nosas compañeiras e compañeiros no Goberno; a contratación indefinida, que se converte en regra; o retorno á ultraactividade nos convenios colectivos ou a prevalencia do convenio do sector sobre o da empresa, entre outros.

Na manifestación convocada por CCOO baixo o lema “ Subir salarios, baixar prezos e repartir beneficios”, o candidato Roberto Yáñez puxo de manifesto “a importancia do diálogo social para garantir a mellora da vida das traballadoras e dos traballadores e a necesidade da mesma para continuar avanzando na conquista de dereitos”.