Os nenos de 1º e 2º de Primaria debían elaborar unha peza audiovisual sobre o respecto pola auga, resultando logo 4 gañadores, un por provincia, ademais de finalistas
Vázquez Mourelle entregou hoxe, xunto co delegado territorial da Xunta en Lugo, Javier Arias, o galardón, dotado con 3.000 €, ao proxecto gañador na provincia de Lugo, realizado polos alumnos de 1º de primaria deste centro.
Destacou que o vídeo galardoado, “Gota a gota tamén se esgota”, traslada nun minuto consellos para aforrar auga e incide en que o coidado deste recurso é tarefa e responsabilidade de todos. Entre as recomendacións dos escolares para o aforro da auga figuran o pechar a billa cando se lavan os dentes ou as mans; instalar dispositivos de aforro; aproveitar a auga da chuvia para regar as plantas; ou reducir o uso de microplásticos porque contaminan os ríos e o mar.
Agradeceu aos rapaces e aos profesores a tarefa que fixeron para transmitir a mensaxe de coidado da auga, así como os valores e consellos para preservala e non malgastala.
Ethel Vázquez puxo en valor a acollida destes 1º Premios Escolares Innovaugas 4.0 que organiza Augas de Galicia en colaboración coa Consellería de Cultura, Educación, Formación Profesional e Universidades para promover e fomentar o uso responsable da auga entre os máis novos.
A iniciativa ía dirixida aos nenos de primeiro e segundo curso de primaria de toda Galicia, que debían elaborar unha peza audiovisual sobre o respecto pola auga. Unha vez presentados os traballos, elixíronse 4 gañadores, un por provincia, ademais de finalistas.
Innovaugas 4.0
Estes premios enmárcanse no proxecto Innovaugas 4.0, promovido pola Xunta para acadar solucións novas para a xestión integrada avanzada das augas, optimizar os recursos hídricos e dar resposta a longo prazo ás demandas dos diferentes usos, en equilibrio co medio natural.
O proxecto Innovaugas 4.0 conta cun orzamento de 7 millóns de euros e está cofinanciado nun 80% polo Fondo Europeo de Desenvolvemento Rexional (FEDER) a través do Programa Operativo Plurirrexional de España (POPE) 2014-2020.
O proxecto Innovaugas 4.0 foi seleccionado polo Ministerio de Ciencia e Innovación no ano 2020 e conta cunha axuda de fondos europeos de 4,2 M€, sendo cofinanciado tamén pola Axencia Galega de Innovación, con 700.000 euros, e por Augas de Galicia, con 2,1 M€.