O rexedor contou que “fixemos promoción da Feira do Bonito, que terá lugar en Burela a primeira fin de semana do mes agosto. E houbo unha degustación, que correu a cargo de Ledicia. Os que alí se achegaron puideron probar o bonito en salpicón e tamén en empanada”.
Alfredo Llano convidou “á xente de Silleda e á que estes días visita a Semana Verde a que se acheguen á nosa Feira do Bonito en agosto, festa declarada de interese turístico nacional. É unha cita que non deben perder”.
O alcalde explicou que “acudimos a Silleda para seguir dando a coñecer o noso concello e os seus potenciais turísticos como as praias, o barco museo, a gastronomía e tamén a importancia do sector náutico pesqueiro. Alí chamou moito a atención unha maqueta que levamos dun pesqueiro. E tamén incidimos na pesca sostible que practican os nosos barcos con especies como o bonito ou a pescada”.
E engadiu: “pensamos que é importante estar nestas feiras para facer promoción de Burela”.