Últimos abonos dispoñibles para o Festival Bal y Gay 2023, cuxas entradas estarán á venda o 26 de xuño

A Mariña, 15 de xuño, 2023. Crece a expectación para a décima edición do ‘Festival Bal y Gay’, que ofrecerá 13 concertos do 10 ao 24 de agosto como referente de música clásica en España polas súas excelentes propostas artísticas en espazos emblemáticos da Mariña (Lugo). A venda de abonos avanza a bo ritmo, pero aínda quedan abonos dispoñibles -desde 120 euros para todos os concertos- en festivalbalygay.com e as entradas para cada actuación poñeranse á venda o vindeiro luns 26 de xuño. Maria João Pires, Konstantin Krimmel, Cuarteto Quiroga, Orquestra Sinfónica de Galicia, Real Filharmonía de Galicia, Juan Pérez Floristán co seu Trío VibrArt, Kebyart, Sara Ferrández, Rocío Pérez, Opera Omnia, Conrado Moya ou Katarzyna Myćka formarán parte unha brilante programación, que mestura contrastados artistas e grupos nacionais e internacionais con mozos de gran proxección mundial.

PROGRAMACIÓN ‘FESTIVAL BAL Y GAY 2023’

Real Filharmonía de Galicia con Maximino Zumalave (día 10, Teatro Pastor Díaz de Viveiro)
Kebyart (día 12, Fortaleza de Alfoz)
Rocío Pérez (día 13, Auditorio Hernán Naval de Ribadeo)
Sara Ferrández (día 14, Iglesia de Lourenzá)
Maria João Pires (día 15, Auditorio Hernán Naval de Ribadeo)
Cuarteto Quiroga (día 16, Basílica de San Martiño de Foz)
Juan Pérez Floristán co seu Trío VibrArt (día 18, Pazo do Conde de Fontao de Foz)
Conrado Moya e Katarzyna Myćka (día 19, Fábrica de Sargadelos de Cervo)
Opera Omnia (día 20, Iglesia de Santiago de Foz)
Konstantin Krimmel (día 21, Catedral de Mondoñedo)
Quinteto Zoar (día 22, Benquerencia, Barreiros)
Orquestra Sinfónica de Galicia (día 24, Catedral de Mondoñedo)

O ‘Festival Bal y Gay’ é único a nivel nacional. A fusión da música con emprazamentos fascinantes converte os concertos en eventos repletos de autenticidade e identidade. Grandes artistas nacionais e internacionais visitan en agosto as localidades da comarca da Mariña. Unha viaxe polas distintas etapas da música clásica nunha programación que abarca desde o barroco máis temperán ata o século XX con chiscadelas a outros estilos. Un proxecto que inclúe diversas sensibilidades estéticas e propostas para ampliar o horizonte do público.

O festival enche cada ano A Mariña de música en vivo de calidade, afianzando esta comarca lucense como destino cultural de referencia en Galicia e España. Ademais, desexa facilitar que a poboación local goce dunha programación musical de excelencia en espazos extraordinarios onde a música comparte protagonismo coa historia, o patrimonio, a paisaxe ou a gastronomía da zona. O gran reclamo do evento é a experiencia 360 que ofrece A Mariña, así como o alto nivel dunhas propostas artísticas comparables ás de calquera sala de gran prestixio nacional e internacional.

O ‘Festival Bal y Gay’ nace en 2014 como iniciativa da Asociación Jesús Bal y Gay, agora convertida na Fundación Xesús Bal y Gay. O seu propósito é facer accesible a música clásica para todos os públicos, democratizando e descentralizando a cultura. Un proxecto que enriquece culturalmente á poboación e cuxa afluencia turística dota á provincia de Lugo e a Galicia de maior visibilidade. Un modelo incomparable que permite o contacto entre municipios (Foz, Mondoñedo, Ribadeo, Viveiro, Cervo, Lourenzá, Barreiros, Alfoz) e ao público gozar da beleza da comarca.