Na primeira planta, os máis pequenos, amosan réplicas feitas por eles da Fonte de Herón, da Copa de Arquímedes e da pila de Volta. Tamén fan demostracións da extracción da seda e do ADN,analizan as pegadas dactilares e explican como separar os pigmentos vexetais por cromatografía. Ademais, con ingredientes caseiros, ensinan a facer estalactitas, cristais, arcos da vella líquidos, globos non newtonianos, volcáns e lámpadas de lava.
Na segunda planta, o alumnado de 2º ESO explica como facer unha ponte autosustentable, unha caixa de resonancia ou un visor de hologramas. A cargo dos de 3º ESO hai unha serie de traballos relacionados coa alimentación e os de 4º elaboraron con lombarda unha escala caseira e papel indicador de ph e fixeron un estudo relacionando a acidez do solo coa cor das hortensias. Asimesmo, pódese observar unha exposición sobre aves mariñas cedida polo CEIDA baixo o título “Compañeiras do mar e do ceo”.
Algúns traballos foron feitos no Club de Ciencia e outros nas materias de proxecto competencial, tecnoloxía e bioloxía. O profesorado participante (Javier Rodríguez, Leticia Fernández, Andrés Rodríguez e Susi Besteiro) agradece a implicación das alumnas e alumnos e dalles a noraboa polo traballo realizado.