O representante da Xunta lembrou que Galicia sempre defendeu a necesidade de pensar nos portos da comunidade -tanto os autonómicos como os de ámbito nacional- como un único ente, coordinando e acompasando a súa actividade para mellorar os resultados do conxunto. Esa visión, expuxo, contribuíu a que estean a recuperarse do impacto da alerta sanitaria polo coronavirus malia as dificultades vividas por outras cuestións como a escalada de prezos nos últimos meses, o encarecemento da enerxía ou as consecuencias da guerra en Ucraína. Por iso, apostou por traballar de xeito coordinado para captar novos tráficos que fagan competitivos os portos e permitan diversificar a súa actividade, o que axudará a que acaden unha maior fortaleza coa que facer fronte a calquera contratempo.