A mellor maneira de frear a un PP aliado da extrema dereita antigalega é encher as urnas de votos BNG e ter un grupo galego forte en Madrid
“Aquí coñecemos moi ben que pasa cando goberna o PP de Feijóo: menos rural, menos sanidade pública, menos emprego, menos vivenda, menos dereitos, máis emigración, máis precariedade, máis débeda pública, máis ataques a nosa lingua e a nosa cultura”, subliñou, sintetizando o resultado das políticas dun Partido Popular “que nos deixa unha Galiza máis pequena”.
Un Feijóo, denunciou, que quere gobernar coa extrema dereita machista, racista, “e profundamente antigalega”, criticou, lembrando o que o propio candidato popular declaraba cando era presidente da Xunta. “Non teño intención de pactar con VOX, nunca o farei porque é un partido que está contra Galiza, dicía fai ben pouco, e aí o tendes aliado da extrema dereita antigalega, que quere acabar coas nosas institucións, que quere até prohibirnos falar a nosa lingua, pero non llo imos permitir”.
A mellor maneira de frear a un PP de ganchete coa extrema dereita, alegou, é encher as urnas de votos ao BNG este 23 de xullo, “porque cada deputadx máis do BNG é un deputadx menos do PP; porque cada escano máis para o BNG en Galiza é un escano menos para o PP”, proclamou, deixando claro que o Bloque vai a por todas para conseguir un grupo galego forte con deputados e deputadas polas catro provincia, un grupo que faga respectar Galiza en Madrid e lle pare os pés a esa alianza antigalega.
Pola súa parte, o cabeza de lista por Lugo, Daniel Castro, puxo o foco na “inutilidade” política dos 66 deputadxs que foron pasando polo Congreso pero que nada fixeron por mellorar a provincia, “non porque sexan menos listos ou traballadores, senón porque fan o que lles mandan desde Génova e Ferraz onde nin A Mariña nin Lugo lles importan nada”.
“Vós credes que se houbese un socavón como o da Areoura en Madrid ou se tivese caído un viaducto que é unha vía principal seguirían agardando? Claro que non! E esa discriminación das forzas estatais ten consecuencias para Lugo, porque perdemos oportunidades, porque as empresas non veñen a un territorio mal comunicado e todo iso fai que a xente moza marche”, explicou.
Votar BNG é a mellor maneira de facer valer A Mariña e de facer valer Lugo en Madrid e, ademais, de pararlle os pés a ese PP “que vai da man dos que nos odian, dos que odian este País, a nosa cultura e a nosa lingua e dos que se poden van intentar acabar con ela”. Por iso, recalcou, “este 23 de xullo temos que facer historia, con toda a forza e toda a ilusión, logrando o primeiro deputado do BNG por Lugo para formar parte dese grupo galego forte que Galiza precisa no Congreso para facerse respectar”.
Neste sentido, Castro destacou que o voto ao BNG vale dobre, “primeiro, porque defendemos o país, defendemos a Mariña e imos pelexar pola A74, pola Autoridade Portuaria, polo dique norte, polo tren do século XXI e por suposto polo mantemento dos postos de traballo de Alcoa e das auxiliares. E todo isto, podo aseguralo, só o imos facer no BNG”, argumentou no mitin en Foz.
O segundo valor do voto BNG é “pararlle os pés á alianza de ultras porque temos ao alcance da man darlle a Lugo un deputado coas mans libres para facernos valer en Madrid, até o CIS di que estamos a nada de conseguir por primeira vez na historia un deputado pola provincia de Lugo e que ademais imos sacarllo ao PP”.
“Imos sacarllo ao PP máis radical da historia, o que vai da man de VOX, o que lle está a dicir á sociedade que a violencia machista non existe, o que quita bandeiras LGBT, o que lle di á xente que non pode ser quen é e non pode amar a quen ama. E tamén o PP que vai da man dos que nos odian, dos que odian este país, a nosa cultura e a nosa lingua e dos que se poden van intentar acabar con ellas”, denunciou.
“Pero podemos impedirllo, votar BNG é votar pola Mariña e votar BNG é parar á dereita, por iso este 23 de xullo temos que facer historia, con toda a forza e toda a ilusión, dándolle a Lugo un deputado do BNG e ter ese grupo galego forte no Congreso que Galiza tanto necesita”, concluíu.
Máis BNG significa menos PP
Unha cuestión que tamén destacou Pontón: “Hai que quitarlle escanos ao PP para darllos ao BNG, empezando aquí en Lugo, con Daniel Castro, onde lle estamos disputando un deputado ao PP, pero tamén en Ourense, en Pontevedra e na Coruña. Por iso pido encher as urnas de votos ao BNG e conseguir un grupo galego forte capaz de facer valer Galiza en Madrid e de frear ese tándem PP ultra de ganchete coa extrema dereita antigalega que nos quere prohibir ser o que somos. Non llo imos permitir!”.
Pontón destacou que esté é “o momento do BNG e o momento de Galiza”, por moito que queiran reducir a campaña ao bipartidismo Sánchez-Feijóo. Está en xogo ter máis peso político ou ser ignorado; defender o noso ou seguir soportando a discriminación das forzas estatais. “A todas as persoas que queren a este País dicirlles que a súa alternativa é o BNG, a única forza coas mans libres para facer respectar Galiza en Madrid”.
Por iso, recalcou, non é momento de votar polo mal menor, nin de votar por medo, ao contrario, “pídolle a todos os galegos e ás galegas que o 23X voten con ilusión, con esperanza, que voten por un grupo galego forte, sabendo que o BNG non lles vai fallar. Votemos coa cabeza e co corazón en Galiza”,concluíu.