Arias informa dos apoios da Xunta a concellos e ao sector turístico para adherirse á marca Q de Calidade

Na provincia ostentan o distintivo preto de 40 recursos, a maioría establecementos de aloxamento e restauración

Palas de Rei, 5 de xullo de 2023. A Xunta de Galicia publicou unha nova convocatoria de axudas para impulsar a adhesión á marca Q de Calidade dos recursos turísticos galegos públicos e privados. O delegado territorial de Lugo, Javier Arias, explicou hoxe en Palas de Rei os pormenores do programa, que conta cun orzamento de 170.000 euros.

Arias visitou o albergue Zendoira, o único aloxamento destas características que conta co selo de calidade na provincia e un dos tres establecementos do municipio que comparten recoñecemento, xunto co hotel Casa Benilde e o complexo rural Parada das Bestas.

O delegado lembrou que mañá remata o prazo para solicitar as achegas. Os destinatarios dos apoios son os concellos e as persoas físicas ou xurídicas titulares de establecementos ou servizos turísticos, e o obxectivo é colaborar cos gastos que implican os procesos de control de cumprimento das normas UNE, que determinan a obtención ou renovación do distintivo. Entre eles, figuran os custos da auditoría externa ou os derivados dos dereitos de uso da marca Q durante a presente anualidade.

No conxunto da provincia hai 37 recursos recoñecidos coa Q de Calidade polo Instituto para a Calidade Turística Española (ICTE). Dese total, 18 son establecementos de aloxamento e cinco son restaurantes. No que respecta aos concellos, os de Viveiro, Ribadeo e Foz suman cinco praias coa distinción, e o de Sober a rede de miradoiros.

Javier Arias subliñou que a Q de Calidade é “garantía de excelencia e un distintivo de prestixio que pode decantar a elección dos viaxeiros nun mercado turístico definido por un crecente nivel de exixencia”.