“O PP de Ribadeo, estando na oposición, fartouse de dicir que non se fixeran as obras do carril bici cara ao faro por mor dun poste de luz. Mesmo chanceou a conta de dito poste dicindo que era mellor que non se realizara esa obra antes de retirar tal poste. Todo con tal de que o anterior goberno municipal non mostrara a súa capacidade de traballo. Pero o carril bici é unha realidade. E o poste xa foi eliminado. E como fomos intelixentes, no canto de nos deixar enlear polo mago Houdini da palabra trapalleira, levamos adiante o proxecto, aproveitamos o convenio coa Deputación, e logramos un novo éxito para a veciñanza ribadense. Claro que era mellor ter inaugurado dito carril bici sen o poste en cuestión, pero eran dous procesos distintos, que ao remate chegaron cada un á súa fin”.
“Por riba de tanto oportunismo, aínda anda agora o actual alcalde a apropiarse de logros do anterior goberno. Por moito que puxeran o berro no ceo por esta ou calquera outra actuación do anterior goberno do BNG de Ribadeo, Daniel Vega anda a botar man de todos os logros de dito goberno do BNG e fai como se foran cousas que se lle ocorreran a el e que el vai poñer en marcha”.
“No caso da reforma das instalacións do club de piragüismo “Altruán”, outra vez o señor Daniel Vega corre para poñerse medallas como se fora el o “gran conseguidor”. No canto de lograr que se concreten os investimentos que vai facer a Xunta en Ribadeo, todo son gabanzas de investimentos sen detallar por parte da Xunta para Ribadeo. O mesmo que criticaba a defensa do anterior goberno municipal da herdanza do doutor Moreda, e que conspiraba para entorpecer o éxito e a execución de dita herdanza, agora presume de que grazas ao filántropo ribadense e á Xunta (que segue sen especificar canto vai achegar para a reforma do Hospital Asilo) Ribadeo vai ter unha nova residencia para persoas maiores”.
“O mesmo que maquinaba entre os propietarios dos terreos próximos á praia das Catedrais, agora preséntanos a inigualábel e “inédita” idea de construír un estacionamento na contorna da praia de Augas Santas para lograr que a xente que visite dito areal se achegue despois a Ribadeo. Ignora o señor Vega o Plan Especial das Catedrais? É que quere facernos crer que con construír un estacionamento nas Catedrais xa está desenvolvido todo o Plan Especial? Deixe de lle lavar a cara á Xunta, señor Vega. Sempre anda a diluír as propostas serias para que semelle que, con facer tres ou catro cousiñas, xa está solucionado todo. Esixa xa á Xunta que se implique na realización do Plan Especial das Catedrais!”.
Mentres tanto, o BNG de Ribadeo, “seguirá negociando con distintos organismos a través dos seus representantes para lograrmos materializar vellos e novos proxectos que han de seguir facendo de Ribadeo un lugar atractivo con capacidade de xeración de riqueza e dinamización do tecido asociativo ribadense”.