O evento foi presentado este domingo coa presenza de Marta Castrillón, presidenta do clube organizador, Pablo Castrillón e Diego Carregal, membros da directiva, Dani García, deputado provincial e concelleiro de deportes do Concello de Barreiros, e Manuel Otero, xefe provincial de deportes da Xunta de Galicia.
A proba contará cun percorrido de 34 km. e un desnivel positivo de 1100 m. Dentro das novidades deste ano engádese a opción de percorrer unha distancia menor, 32 km. superando un desnivel de +900 m. A presidenta da asociación deportiva sinala que “As dúas opcións quedan a elección do participante segundo o seu estado de forma, a dificultade técnica que prefira e as condicións meteorolóxicas que se presenten no propio día da proba”. Marta Castrillón destacou tamén que “este ano fixemos algunha modificación no percorrido para reducir súa dureza e facelo máis ciclable pero sen afastarse do entorno natural que temos en Barreiros”.
A saída terá lugar na pista de pádel en San Miguel de Reinante, onde se recollerán tamén os dorsais e os agasallos por participar. O aparcadoiro e as duchas, para despois da ruta, será no campo de fútbol de As Valgas, tendo a posibilidade tamén de lavar as bicicletas alí mesmo. Ao remate haberá un pincheo para tódolos participantes.
As inscricións continúan abertas ata o 15 de novembro na páxina web championchipnorte (ccnorte.com)