Ao longo da mañá, axentes da Garda Civil, da Policía Nacional, da Policía Autonómica e das Policías Locais afondarán entre outras cuestións en aspectos legais relacionadas cos dispositivos de control telemático, que en Galicia protexen a 230 mulleres dos seus agresores
A institución colabora coa organización da acción formativa, que corre a cargo da Delegación do Goberno dentro dos actos conmemorativos do 25-N, o Día Internacional da Eliminación da Violencia contra a Muller. “Para nós é unha satisfacción acoller nesta sede da institución provincial un encontro tan relevante para seguir avanzando e mellorando na loita contra a violencia machista, un obxectivo prioritario co que estamos plenamente comprometidos”, subliñou o Presidente.
Unha xornada, engadiu José Tomé, que “contribúe a manter a aposta de formación permanente que converte ás nosas Forzas e Corpos de Seguridade do Estado nun colectivo profesional, preparado e capaz de facer fronte a todo tipo de situacións, algunhas tan complexas como as que se producen ao redor da violencia de xénero”. “Co seu traballo de investigación, coas unidades centradas na atención de mulleres e menores ou coas charlas en centros educativos para axudar a erradicar os comportamentos machistas, as Forzas e Corpos de Seguridade do Estado cumpren un papel clave na loita contra o delito, na prevención, e tamén no traballo que todos e todas temos que facer para construír unha sociedade igualitaria e xusta, sen violencia machista”.
Así mesmo, amosouse firme contra esta lacra porque “a realidade da violencia contra a muller é terrible. Mentres haxa una soa muller maltratada, asasinada, vítima de calquera tipo de violencia, será terrible. Pero, sen dúbida, xornadas como esta son un paso máis no bo camiño. Un camiño que recibiu un impulso renovado a partir do compromiso expresado polo Goberno a través do Pacto de Estado contra a Violencia de Xénero, unha ferramenta que nos permite ao conxunto das administracións públicas coordinarnos e desenvolver estratexias conxuntas”.
Colaboración institucional, “a mellor forma de prestar un servizo útil á cidadanía”
O Presidente destacou que a xornada celebrada hoxe é “un exemplo máis da sintonía e da colaboración aberta e leal que mantemos a Deputación, o Goberno de España e o Concello de Lugo para sacar adiante medidas e proxectos positivos para a cidadanía. A colaboración institucional, de feito, é a mellor forma de prestar un servicio realmente útil á cidadanía”.
“Unha colaboración para impulsar proxectos e investimentos para a nosa provincia, que outros meteran nun caixón, recuperando así o protagonismo de Lugo na axenda política do noso país, pero tamén, e non menos importante, como centro de debate en torno a temas de interese prioritario e global, como o que aborda esta xornada”, incidiu.
O mandatario provincial coincidiu nas súas palabras co Delegado do Goberno en Galicia, Pedro Blanco Lobeiras, quen insistiu esta mañá na importancia da coordinación entre administracións, xustiza e forzas de seguridade para facer efectivas as medidas de protección das vítimas da violencia de xénero. Pedro Blanco puxo de relevo os avances normativos e tecnolóxicos e o incremento de fondos que realizou estes anos o Goberno central grazas ao Pacto de Estado contra a Violencia de Xénero.
O Delegado lembrou que 230 mulleres viven hoxe en Galicia cun dispositivo deste tipo, ás que se suman outras 700 que dispoñen dunha atención telefónica e de localización 24 horas a través do servizo Atenpro. Nas súas palabras, destacou que estas medidas de protección “son ferramentas fundamentais na batalla que libramos contra a violencia de xénero, por iso é importantísimo que cada persoa implicada coñeza ben estas armas e as saiba utilizar”.
Advertiu o Delegado que nestes momentos en Galicia hai 4.700 casos activos no sistema Viogen, “4.700 mulleres que non poden vivir tranquilas, que teñen medo e que ven as súas vidas ameazadas”, e engadiu que “a nosa responsabilidade e a nosa tarefa é xestionar adecuadamente este conxunto de elementos para darlles seguridade e protección”, subliñou.
Pola súa parte, a Alcaldesa de Lugo reivindicou a necesidade de promover políticas activas para combater esta lacra, como veñen facendo de forma determinante os gobernos socialistas no Goberno de España, onde os executivos de Rodríguez Zapatero e Pedro Sánchez acadaron os avances máis significativos da democracia nesta loita, ao tempo que melloraron a protección das vítimas.
“Sen unha lexislación adecuada e unha dotación de recursos económicos acorde, a efectividade do traballo policial na rúa non sería posible”, sinalou a rexedora, quen destacou que o Goberno local leva anos realizando un importante traballo educativo e de concienciación coa mocidade. “As novas tecnoloxías supoñen unha nova canle de difusión da violencia, peor tamén unha oportunidade para aportar a axuda desde as administracións públicas e as forzas e corpos de seguridade”, concluíu.