Un traballador foi trasladado logo de caer desde unha ponte ás vías do tren en Mañón

Mañón, 24 Abril, 2024. Un particular alertou deste suceso pouco despois das 00:20 horas da madrugada, logo de que o traballador caese cando estaba cortando unha árbore. A persoa que chamou ao 112 Galicia tamén indicou que o ferido non parecía estar atrapado mais si precisaba asistencia sanitaria, polo que se informou ao Servizo de Urxencias Sanitarias de Galicia-061.

De igual maneira, os xestores do 112 Galicia tamén avisaron do accidente á Garda Civil da Coruña e Agrupación de Voluntarios de Protección Civil de Mañón. Tamén tivo coñecemento disto Adif, empresa responsable da administración de infraestruturas ferroviarias.

Xa no punto, os voluntarios de Protección Civil indicaron que o traballador mancara unha man e levara un golpe na cabeza. Pese a que caeu na vía, sobre ela había unhas ramas dunha árbore que puideron amortecer o impacto.

Finalmente, a persoa tivo que ser trasladada en ambulancia ata o hospital de referencia polos profesionais das Servizo de Urxencias Sanitarias de Galicia-061.