A presidenta de Acisa, Carmen Cruzado, contou que “Luz María Martínez, Manuel Rodríguez y Lucita Álvarez foron os gañadores dos premios da campaña de San Valentín de Acisa Ribadeo, aos que onte pola tarde lles fixemos entrega dos seus agasallos. Desde a asociación queremos felicitalos e darlles as grazas por mercar no noso comercio”.
O xerente de Acisa, Jesús Pérez, indicou que “Luz María Martínez resultou agraciada cunha cea para dúas persoas no restaurante Javier Montero; Manuel Rodríguez foi o gañador dunha cea para dúas persoas no restaurante San Miguel; e Lucita Álvarez gozará dunha noite con almorzo no Parador de Turismo de Ribadeo. As persoas afortunadas fixeron compras e depositaron as súas papeletas en Grisi, Capturas Pesca y Anais. Os agraciados poden desfrutar dos premios segundo as condicións marcadas polos locais que os doaron”.
Cruzado Iglesias subliñou: “temos que agradecer o apoio ao comercio local tanto das nosas veciñas e veciños, como os de toda a contorna, de Asturias e de Galicia. E animámolos a seguir apostando polos nosos negocios durante todo o ano, porque ademais de mercar poden levar algún importante premio. Do mesmo xeito temos que darlles ás grazas ás empresas que doaron os premios para a pasada campaña de San Valentin”.
Os premios foron entregados nas oficinas de Acisa onte pola tarde, tras a celebración do sorteo entre as preto das 9.000 rifas recollidas que foron cubertas pola clientela do comercio asociado, que fixo as súas compras dende o 6 ata o 16 de febreiro.
Na entrega de premios participaron a presidenta e o xerente do colectivo empresarial ribadense. Esta actividade estivo cofinanciada pola Xunta de Galicia.