En defensa dos pacientes da Mariña, día 12: “Non podemos permitir que o dereito á saúde sexa convertido nun luxo. É un dereito fundamental e temos que defendelo”

“A sanidade pública da Mariña está en situación crítica como consecuencia directa das decisións da Consellería de Sanidade, da Xerencia da área Sanitaria e o silencio cómplice da Dirección do Hospital da Mariña”

Burela a 28 de abril de 2025. Unha situación que está a xerar un clima de “desesperación” tanto entre os pacientes, que poden esperar máis dun ano por consultas ou intervencións, como entre os traballadores da sanidade, que se ven desbordados ante a falta de medios.

A Xunta de Persoal do Hospital da Mariña, alerta da situación crítica “en servizos como Medicina Interna, Uroloxía, Cardioloxía, Dixestivo, Dermatoloxía, Radioloxía por falta de persoal que provoca suspensión de consultas, aumento das listas de espera e derivacións a Lugo para probas diagnósticas, cirurxías e ingresos”.

Consideran que a falta de profesionais “non se debe tan só a escaseza dos mesmos, e así atopámonos con categorías nas que existe moita dispoñibilidade, pero o Sergas négase a incrementar o cadro de persoal como acontece, entre outras categorías coas técnicas de Farmacia ou servizos como o paritorio que se atopa sen dotación de TCAE”.

“Temos que mobilizarnos para defender unha das grandes conquistas sociais, como é a sanidade pública”, conclúen dende a Xunta de Persoal do Distrito Sanitario de Mariña.