66 equipos participarán na categoría de +35 e 16 na de +45. Os clubs que se desprazarán ata Ribadeo proceden de México, Arxentina, Portugal, Irlanda, Francia, Bangladesh, Italia, República Checa e España (9 comunidades autónomas).
Os organizadores estiman que entre todos os equipos desprazarán a Ribadeo a máis de 2.500 persoas, das que arredor de 1.650 son xogadores e o resto acompañantes: “a maioría dos equipos estarán en Ribadeo desde mañá ata o vindeiro luns, pero xa contamos con algún equipo na vila desde o martes, que aproveitan para coñecer os campos de fútbol nos que van xogar e para facer turismo pola zona”.
O concelleiro de Deportes, Francisco José Silvent, declarou: “por parte do Concello apoiamos en todo o que podemos este importante evento deportivo e agradecemos moito o esforzo que fai a Asociación de Veteranos do Ribadeo FC. O Torneo encherá de xente a nosa vila esta fin de semana de maio así como outros concellos da zona porque van competir en diferentes instalacións de distintos municipios galegos e asturianos. Agardamos que lles guste moito Ribadeo e que se convertan nos mellores embaixadores posibles do noso concello”.
A presidenta de Acisa Ribadeo, Carmen Cruzado, manifestou: “desde Acisa Ribadeo estamos encantados de colaborar, un ano máis, con este torneo internacional, que organiza a Asociación de Veteranos do Ribadeo FC. Agardamos que os 82 equipos participantes e os seus acompañantes disfruten da súa estadía entre nós. É unha fin de semana moi importante pola dinamización económica que implica esta cita para os hoteis, bares e restaurantes e tamén o será para o comercio. A unión de deporte e turismo é moi importante para Ribadeo e o seu tecido empresarial”.
Desde a asociación de veteranos do Ribadeo FC o seu presidente, Juan Rodríguez Peceux, subliñou que “desde a organización só nos queda agradecer a todos aqueles que fan posible que este torneo siga crecendo e que ano tras ano poidamos encher Ribadeo e os municipios limítrofes. Quero desexarlles a todos os participantes que se divirtan e que aproveiten para coñecer moito a zona na que van estar”.
No acto de presentación participaron tamén o alcalde, Dani Vega, o delegado territorial da Xunta en Lugo, Javier Arias, o xerente de Acisa Ribadeo, Jesús Pérez; e o técnico municipal de Deportes, Iván López.