O Presidente, José Tomé Roca, asinou un convenio de colaboración co presidente do Colexio Oficial de Graduados Sociais de Lugo, Manuel Núñez Carreira, mediante o cal a institución provincial achega 25.000€ para financiar este servizo
As principais cuestións ás que se dá resposta están relacionadas con asuntos de estranxeiría, condicións laborais ou dereitos e axudas sociais, entre outros temas. Este recurso, que se desenvolve da man dos profesionais da entidade lucense, leva en marcha sete anos consecutivos cunha tendencia á alza no número de consultas. No 2024 -a maiores das peticións que se atenderon telefonicamente- deuse resposta as dúbidas de xeito presencial de 114 persoas.
O mandatario provincial recalcou que “desde a institución provincial renovamos novamente esta colaboración co Colexio Oficial de Graduados Sociais de Lugo porque presta un labor fundamental, ofrecendo atención especializada a aqueles veciños e veciñas da provincia que se atopan en situacións de vulnerabilidade. O incremento das consultas ano tras ano demostra a necesidade deste recurso, así como a calidade, o rigor e a profesionalidade coa que se desenvolve esta iniciativa social”.
Pola súa banda, Manuel Núñez agradeceu o apoio económico da Deputación de Lugo e recordou o funcionamento deste servizo de asesoramento que “levamos a cabo tanto de xeito telefónico como presencial sen necesidade de que os propios solicitantes teñan que desprazarse ata a sede, pois son os propios profesionais o que o fan”. Así mesmo, avanzou que as persoas interesadas deben solicitar cita previa no Colexio para iniciar os trámites da consulta.