A reactivación do espazo é unha das prioridades do equipo de goberno
A axuda terá que empregarse, entre outras accións, para redactar o proxecto da Praza de Abastos en colaboración cos placeiros, aos que tamén se lles destinará unha parte do importe en actividades de formación. Tamén está contemplada na partida a dirección de obra.
A alcaldesa Mariña Gueimunde xa explicara na comparecencia de prensa do venres 16 de maio que unha das prioridades do equipo de goberno é a reactivación da Praza de Abastos. «Temos interese en que volva a ser a que foi, porque está no corazón de Viveiro. Apostamos polo comercio tradicional e de proximidade. O goberno anterior solicitou unha diagnose e nós, unha subvención. Mentres non se produza a rehabilitación, posiblemente ata o seguinte exercicio, hai que darlle vida. Por iso sacamos de novo a licitación os postos», expuxo.