Traspielas é unha proposta audiovisual que nace a partir de pezas tradicionais recollidas pola propia artista na súa aldea de Traspielas (Fornelos de Montes). Acompañada por un equipo artístico multidisciplinar, Su Garrido Pombo ofrece unha creación contemporánea que combina música, poesía e imaxes actuais e de arquivo, nun diálogo entre pasado e presente.
O espectáculo pon o foco na memoria colectiva, na voz das mulleres e na cultura popular do territorio, revitalizando o legado sonoro da tradición galega a través dunha posta en escena que mestura emoción, etnografía e vangarda.
Este concerto supón a apertura simbólica das III Xornadas Etnográficas da Mariña, que se desenvolverán en Barreiros do 30 de maio ao 1 de xuño, e reafirma o compromiso da organización coa difusión e valorización da cultura tradicional galega desde unha mirada actual.
O evento conta coa colaboración do Concello de Barreiros e da área de Mocidade da Vicepresidencia da Deputación de Lugo. A entrada é de balde. O deseño dos carteis destas XEAM está asinado polo artista mariñao DAViXiNO.