“Dixeron que bloqueaban os orzamentos para beneficiar ás asociacións, e fixeron todo o contrario. Agora que gobernan, non moven ficha”, critica Míriam Bermúdez
“Estamos xa en maio, e sabemos que por prazos legais de exposición pública os orzamentos agora xa non se poderán aprobarse antes de xuño. Iso quere dicir que o goberno vai fóra de prazo, e que este ano estamos ante un novo araso que volvería afectar a clubs, asociacións e entidades culturais e deportivas”, sinala a voceira do BNG, Míriam Bermúdez.
Míriam Bermúdez lembra que o retraso de seis meses na aprobación dos orzamentos de 2024 foi responsabilidade directa do PP e de Por Viveiro, que bloquearon o documento “argumentando que era mellor para as entidades”, cando en realidade o resultado foi o contrario: moitas asociacións viron como quedaban sen recibir os seus pagos a tempo, asfixiadas pola falta de recursos para manter a súa actividade habitual.
“Foi unha operación política deliberada. Bloquearon os orzamentos para desgastar ao goberno, mentres as entidades sufrían. E agora que teñen o goberno, que fixeron? Nada. Nin orzamentos, nin preocupación e o escenario que están a provocar está sendo o mesmo. Están calados e desaparecidos”, critica Bermúdez.
O BNG lembra que Viveiro conta cun tecido asociativo fundamental para a vida social, deportiva e cultural do concello, e que é responsabilidade do goberno local garantir os recursos necesarios en tempo e forma. Por iso, a formación presentará un rogo no próximo pleno esixindo que se retome o calendario previsto e se acelere a tramitación dos orzamentos de 2025.
“O goberno que PP e Por Viveiro formaron debe deixar de vivir da confrontación e asumir responsabilidades. Xa non están na oposición, agora gobernan. E gobernar é garantir que as asociacións poidan traballar con seguridade e estabilidade económica”, conclúe Bermúdez.