Os mariñaos estiveron toda a tempada fóra da zona de descenso, pero caen á penúltima praza na xornada definitiva
O primeiro tempo deu comezo cunha boa ocasión para o visitante Rikelme, pero o seu centro-chute foise rozando o pau dereito da meta defendida por Chispi. Responderon os locais por mediación de Motta cun disparo desde o á dereita que despexaba Kaluza. Instantes despois tiña que voar o porteiro polaco para sacar un tiro de Tomaz que ía camiño da escuadra.
O primeiro tanto chegaría no minuto 7 nunha acción individual de Mellado. O seu disparo tocábao Kaluza, pero non o suficiente para que se coase na meta burelista. Un minuto máis tarde chegaba o segundo nunha falta perigosa na que o rexeite quedaba a Motta para marcar a pracer.
O cadro mariñao tentou responder a este duro golpe cun disparo desde uns dez metros de Pitero, que se marchaba por moi pouco, e unha acción persoal de Quelle, que subía o balón desde a súa propia área e finalizaba a xogada cun disparo desviado. Entremedias probara novamente a Kaluza Waltinho cun disparo potentísimo no que tivo que meter as dúas mans o porteiro laranxa.
Despois dun tempo morto de Duda no minuto 12, o Jimbee Cartaxena acrecentou o seu dominio sobre a meta mariñá e Kaluza resolvía un man a man ante Tomaz e despois era Mellado o que picaba demasiado o balón na saída do polaco. Sufría o Burela, que tería unha boa ocasión na cabeza de Rikelme tras un envío en longo de Kaluza, pero o seu remate íase directamente fóra.
Con cinco faltas xa cometidas e o resultado en contra, a máis de cinco minutos do descanso apostaba David Rial polo xogo de cinco con Quelle coa camiseta de porteiro. E a aposta serviu para frear o torrente de oportunidades dos meloneros sobre a meta visitante e tamén para ter algunha boa ocasión ante o marco local. Rikelme tentouno na primeira acción de porteiro-xogador cun disparo afastado ao que respondía Chispi cunha boa perna e nos segundos previos ao descanso Araya atopábase co pau nun disparo moi escorado e Marc Campàs non podía rematar entre os tres paus tras o rexeite. O seu taconazo íase por moi pouquiño.
O inicio do segundo tempo tivo menos ocasións. Estivo a piques de lograr o terceiro dos locais Motta nun disparo que tocaba nun xogador burelista e íase por moi pouco. Na seguinte acción, o cadro burelista gozaba dunha dobre ocasión. Rikelme e Marc Campàs, sós ante Chemi, non lograban marcar ante o porteiro que ocupaba a portería cartagenera nesta segunda metade.
Despois era Kaluza o que interviña nunha gran acción de Pablo Ramírez de pivote, que se viraba moi ben para rematar ao marco laranxa. No 27 chegaba o terceiro dos meloneros por mediación de Motta, que resolvía á terceira tras dúas grandes intervencións previas de Kaluza. Respondía David Rial sacando a Araya como porteiro-xogador e un minuto máis tarde reducía distancias o cadro burelense cun tanto de Juninho tras pase da morte de Rikelme.
Con todo, duraríalle segundos a alegría ao equipo mariñao, xa que os cartageneros sacaban de centro e aos poucos segundos chegaba o cuarto, anotado por Mouhoudine. Linhares tiña posteriormente o quinto nas súas botas, pero detiña en dous tempos Kaluza. Charly, que portaba agora a camiseta de porteiro, buscaba o segundo local, pero aparecía de novo un inspirado Chemi. Motta e Gon Castejón gozaron de dúas boas ocasións antes de que Juninho tivese o segundo nunha boa acción individual polo á dereita, pero non lograba definir con precisión ante Chemi. Si o facía despois Charly, que resolvía unha gran triangulación con Juninho e Araya.
Pero tamén nesta ocasión duraríalle pouco a alegría aos Pícaros, dado que xa dentro dos dous últimos minutos anotaba o quinto Pablo Ramírez, elevando moi ben o balón ante Isma e marcando desde o centro do campo aproveitando que a portería visitante estaba baleira. Motta, cun potente disparo, redondeaba a conta para os locais e facía o definitivo 6-2.
Ficha Técnica Jimbee Cartagena 6-2 Burela FS
Jimbee Cartagena (6): Chispi; Tomaz, Linhares, Motta, Waltinho -quinteto inicial-, Pablo Ramírez, Mellado, Darío Gil, Mouhoudine, Gon Castejón, Jesús, Osamanmus e Chemi (ps).
Burela FS (2): Kaluza; Araya, Isma, Rikelme, Pitero -quinteto inicial-, Charly, Juninho, Marc Campàs, e Quelle.
Goles: 1-0, min. 7: Mellado. 2-0, min. 8: Motta. 3-0, min. 27: Motta. 3-1, min. 28: Juninho. 4-1, min. 28: Mouhoudine. 4-2, min. 38: Charly. 5-2, min. 39: Pablo Ramírez. 6-2, min. 40: Motta.
Árbitros: Fernando Faubella Zaldívar e José Lázaro Angulo (Colexio de Aragón). Amoestaron ao visitante Quelle e ao seu técnico, David Rial.
Incidencias: Encontro da trixésimo xornada da Primeira División masculina disputado no Palacio de los Deportes de Cartagena ante uns 2.200 espectadores e cun grupo duns 40 afeccionados chegados desde Burela.