Os populares reivindican actuacións para garantir a seguridade e mellorar a imaxe dunha infraestrutura onde se desenvolven importantes actividades culturais e “evitar o malgasto de cantidades máis grandes de fondos públicos que son imprescindibles para acometer outro tipo de obras necesarias para os vilalbeses”
O Concello de Vilalba conta con diversos edificios onde se desfruta de actividades culturais, deportivas ou de lecer que ao longo de moitos anos se foron construíndo para beneficio de todos e todas os veciños de Vilalba.
Pero, nos últimos anos, o goberno bipartito de “PSOE e Vilalba Aberta deixaron abandonar estas infraestruturas no que parece unha política de deixadez de funcións ou brazos caídos en materia de mantemento do patrimonio do Concello”, segundo indican os populares.
O bipartito ten anunciado unha actuación preventiva para evitar danos aos usuarios do auditorio e conservatorio debido á inestabilidade das lousas que cobren a fachada do edificio, pero que “foi rexeitada posteriormente alegando que non atopaba empresas que puideran acometer a reparación do mesmo”.
Os concelleiros do Grupo Municipal Popular indican que “despois de pasados dous anos non podemos tolerar que esta situación continúe degradándose. Non o debemos consentir nin por estética, nin porque os medios económicos necesarios para esta reparación cada día serán mais elevados e, por suposto, tampouco por seguridade. De feito, ironizan sobre o slogan de ‘Cultura segura’ porque “parece máis unha casualidade”.
Para que as cousas funcionen existen diversos plans a nivel técnico que permiten adiantarse aos fallos e, neste caso, deberían aplicar a norma máis elemental do mantemento; xa que gracias a ela, estes problemas acaban sendo mínimos e os custes de reparación moito mais económicos evitando que as instalacións colapsen e se garanta o uso das mesmas nas mellores condicións.
Os populares advirten de que “medran bidueiros no teito do edificio” e de que “o pasillo lateral onde se atopa a saída de emerxencia ten unha capa de ferruxe que da a entender o estado no que se atopa a estrutura que debe ofrecer, precisamente, garantía de uso en caso de emerxencia”.
Estes casos, segundo os concelleiros do PP, evidencian “a ausencia dun control rigoroso sobre o uso e o estado das edificacións, sen ter en conta que isto deriva nun desperdicio de recursos públicos e nunha mala xestión municipal”.