A CMR incumpriu o seu compromiso de activar no mes de abril as medidas de apoio ás produtoras/es de faba de Lourenzá
Entre as mesmas figuraban a concesión dunha axuda directa de minimis ás persoas produtoras inscritas na IXP que podería alcanzar os 2.000€/ha, así como a apertura, no mes de abril, dun instrumento financeiro para dotar de liquidez ás persoas agricultoras e gandeiras galegas en xeral e, de xeito específico, para as de Faba de Lourenzá, co fin de que puideran facer fronte á sementeira.
Sen embargo, logo deste anuncio e a súa correspondente difusión á través dos medios de comunicación, a Xunta de Galicia non activou absolutamente ningún procedemento para cumprir este compromiso. É dicir, estamos en maio e non hai convocatoria nin de axudas directas nin de instrumento financieiro.
“Os anuncios que fixo a Consellería para o mes de abril non se cumpriron e a xente está tendo que asumir agora absolutamente todos os gastos da nova plantación logo de ter perdido a práctica totalidade da última colleita. Xa temos constancia de que hai produtores que están a ter dificultades para afrontar os custos de produción e tiveron que devolver algún pedido, por exemplo de titores”, alerta a produtora de faba de Lourenzá e Secretaria Xeral do SLG-CCLL, Isabel Vilalba. “Esiximos á conselleira que active canto antes as medidas anunciadas, así como celeridade no desenvolvemento do traballo técnico preciso para axudar ás persoas produtoras nas enfermidades que afectan ao cultivo”.
Ademais, queremos reiterar a pertinencia de incluír nestas axudas directas á totalidade de produtoras e produtores de faba, dado que tal e como foron plantexadas inicialmente deixarían fóra á maioría das mesmas, ao estaren dirixidas unicamente ás 19 granxas inscritas na IXP.
Precisamente nos días previos ao anuncio de medidas da Consellaría do Medio Rural (CMR) no mes de marzo, e logo de mantermos vairas xuntanzas co sector produtor galego e asturiano, a produtora e Secretaria Xeral do SLG, Isabel Vilalba; a economista especializada en políticas agrarias europeas e representante polo SLG no Comité Rexional do PEPAC, Ana Rodríguez; a produtora Milagros Gómez e a produtora e envasadora Carmen Seijo entrevistáronse co director da Axencia Galega de Calidade Alimentaria (AGACAL), Martín Alemparte.
Nesta xuntanza dende o SLG realizamos varias propostas concretas de axudas que a Xunta de Galicia podería pór en marcha para que as importantes perdas na colleita deste ano non impliquen un golpe que deixe polo camiño ducias de produtoras e produtores.
Reiteramos hoxe novamente estas demandas á Consellería do Medio Rural:
-Preferentemente da man do Principado de Asturias, defensa en Madrid dunha axuda asociada para a faba na PAC suficiente, como xa existe noutros países europeos como Francia.
-Axuda agroambiental para a faba de 635 euros/hectárea (que xa saca este ano Asturias).
-Axuda de crise con fondos propios para todas as persoas produtoras de faba independentemente da súa inscrición na IXP.
Dende o Sindicato Labrego Galego levamos advertindo da vulnerabilidade do sector produtor de faba e solicitando actuacións xa dende finais do ano pasado, un tempo máis que razoable para que a Consellaría tomase cartas no asunto. Fai xa medio ano tamén que solicitamos unha reunión ca conselleira María José Gómez, á que inda non nos respostaron.