A Vicepresidencia da Deputación de Lugo e o Concello de Barreiros colaboran na organización desta xornada de ocio inclusivo
Baixo o lema “Onde enredarnos como iguais” , a asociación programa unha xornada lúdica con diferentes actividades – probas de puntería, obstáculos, un futbolín humano, xogos coperativos, de habilidade e lóxica ou xogos de mesa xigantes – pensadas para a participación de rapazas e rapaces con diferentes capacidades, creando equipos diversos que favorezan a convivencia.
Os grupos, formados por persoas con e sen diversidade funcional, realizarán un percorrido de cinco probas, distribuíndo as tarefas e colaborando para desenvolvelas de forma colectiva.
A alcaldesa de Barreiros Ana Ermida, o deputado de Mocidade Daniel García e Carmen Iglesias e Nicolás Veiga -impulsores da asociación – presentaron esta proposta de ocio inclusivo, que se desenvolverá no campo da festa de San Miguel de Reinante e que contará cunha trintena de persoas voluntarias para acompañar as persoas participantes, ademais de materiais adaptados con sinalética en braille ou pictogramas.
Ana Ermida e Daniel García convidaron a participar nesta actividade “que ofrece unha oportunidade de ocio accesible e compartido” e “traslada a toda a sociedade a necesidade de seguirmos avanzando na inclusión en todos os ámbitos”.
A Asociación Guillem Veiga Iglesias, creada en homenaxe a Guillem Veiga Igleias, ofrece servizos de asesoramento e apoio para facilitar a detección precoz de dificultades relacionadas co desenvolvemento e organiza actividades de formación, sensiblización e ocio dirixidas a mellorar a calidade de vida e o benestar emocional das nenas e nenos e das súas familias.
A entidade, sen ánimo de lucro, comezou a desenvolver a súa actividade en 2018, desde San Miguel de Reinante, onde teñen a sede, e dirixida fundamentalmente á comarca da Mariña.