A obra «Costa da Morte, cartografía dun naufraxio» representarase en Viveiro o 20 de xuño

Será a partir das 22.00 horas na Praza do Náufrago de Celeiro

Viveiro, 13 de xuño de 2025. O Concello de Viveiro converterase nunha das paradas da xira teatral «Costa da Morte, cartografía dun naufraxio», unha proposta do Centro Dramático Galego dirixida por Mariña Lestón que afonda na memoria colectiva ligada aos naufraxios e á vida mariñeira de Galicia. A representación terá lugar o venres 20 de xuño ás 22.00 horas na praza do Náufrago de Celeiro, un espazo simbólico que se suma á aposta da compañía por escoller localizacións reais como praias, peiraos ou faros para achegar o teatro ao público desde unha experiencia inmersiva.

En caso de que chova, o espectáculo desenvolverase na Casa do Forno.

A alcaldesa Mariña Gueimunde destacou a relevancia desta cita cultural: «É un orgullo formar parte desta xira que reivindica a nosa historia marítima e lle dá voz ás mulleres que quedaban en terra: ás viúvas, ás orfas, ás que socorrían…».

O espectáculo; que mestura narración, música en directo e imaxes audiovisuais; está pensado para público adolescente e adulto. A función en Celeiro enmárcase na programación cultural de verán do Concello de Viveiro.