Aberto o prazo para solicitar espazos e material para as comidas do Mercado Renacentista de Viveiro

O prazo para presentar solicitudes permanecerá aberto do 20 ao 27 de xuño

Viveiro, 18 de xuño de 2025. O Concello de Viveiro vén de aprobar o modelo específico de solicitude para a cesión de espazos públicos e o préstamo de material municipal, con motivo das comidas e ceas populares que se celebrarán o sábado 5 de xullo no marco do Mercado Renacentista 2025.

O prazo para presentar solicitudes permanecerá aberto do 20 ao 27 de xuño, e as peticións atenderanse por orde de rexistro de entrada ata fin de disponibilidade.

O modelo de solicitude está dispoñible no taboleiro de anuncios dixital, na web municipal, impresos en papel no rexistro e na sede electrónica do Concello de Viveiro.

A cesión de material (cadeiras, taboleiros e cabaletes) está destinada exclusivamente a particulares, mentres que os establecementos de hostalería deberán tramitar as súas solicitudes obrigatoriamente a través da sede electrónica. Ademais, será necesario solicitar expresamente o uso do espazo municipal para calquera comida ou cea, mesmo no caso de terrazas que xa conten con autorización previa.

A presentación da solicitude implica a aceptación das condicións establecidas na resolución municipal. Os solicitantes serán responsables do correcto uso do material e do espazo cedido, así como da seguridade durante o desenvolvemento da actividade.