Burela expón a súa experiencia como Cidade Amiga da Infancia nas VI Xornadas formativas de Unicef Galicia

Mario Pillado, tenente da alcaldesa, participou como poñente nun encontro centrado na mellora da gobernanza das políticas locais de infancia

Burela, 5 de xuño de 2025. O Concello de Burela participou onte, mércores 4 de xuño, nas VI Xornadas Formativas de Cidades Amigas da Infancia en Galicia, celebradas na Escola Galega de Administración Pública (EGAP) en Santiago de Compostela. O evento, baixo o título “Da teoría á práctica: mellorar a gobernanza da política local de infancia”, reuniu representantes de diferentes administracións locais, expertos e entidades implicadas na defensa dos dereitos da infancia.

Mario Pillado, tenente da alcaldesa e concelleiro de Xuventude, interviu como poñente na mesa redonda “Gobernanza en Galicia: estado actual, contribucións e experiencias”, onde explicou o proceso e a experiencia do Concello de Burela no marco da iniciativa Cidades Amigas da Infancia, promovida por UNICEF.

A xornada, organizada por UNICEF Comité Galicia xunto coa Consellería de Política Social da Xunta de Galicia e a FEGAMP, desenvolveuse entre as 9:00 e as 14:30 horas. O seu obxectivo foi proporcionar coñecementos e ferramentas prácticas para mellorar a gobernanza das políticas locais de infancia, promover a participación infantil e facilitar o intercambio de experiencias entre entidades locais.

“Foi unha ocasión para aprender doutras realidades municipais e tamén para fortalecer redes entre concellos que compartimos o mesmo obxectivo, construír espazos máis xustos, seguros e participativos para os nosos nenos e nenas”, explicou Pillado.

Burela participou como un dos concellos convidados a compartir boas prácticas, xunto cos municipios de Moaña e Ponteareas. As xornadas incluíron tamén relatorios técnicos, obradoiros prácticos e achegas de nenos, nenas e adolescentes participantes en consellos locais e autonómicos.