Desde ADOS lembran que “do 15 de xuño ao 15 de setembro precisamos en Galicia 27.000 doazóns de sangue para poder satisfacer todas as necesidades dos nosos hospitais. Esta é a época de maior dificultade para acadar esas cifras, por iso se pon en marcha esta campaña informativa especial para sensibilizar sobre a importancia deste acto solidario”.
Un folleto, un vídeo e a presenza de mensaxes na web de ADOS e nas súas redes sociais conforman esta campaña especial de verán, segundo explicou en Ribadeo Ana de Santiago, de ADOS.
O alcalde, Dani Vega, agarda que “as veciñas e os veciños de Ribadeo se acheguen a doar sangue no momento no que teñamos aquí na unidade móbil de ADOS. É moi importante que todas as persoas que poidan doar sangue o fagan, porque calquera de nós pode precisar sangue nalgún momento. Agora ademais a poboación en Ribadeo e nesta comarca increméntase de forma considerable e temos que estar preparados”.
A unidade móbil de ADOS estará en Ribadeo, ao carón da antiga Oficina de Turismo, o vindeiro luns, 23 de xuño, de 10:30 a 14:15 e de 16:30 as 21:00 horas.
O rexedor agradece que ADOS achegase esta campaña especial a Ribadeo #doasanguenoverán