O BNG reclama mellorar os accesos nas praias de Arealonga, San Román e Abrela, no Vicedo

Pide reparar os accesos xa existentes que actualmente están en mal estado e instalar ramplas, como no caso de Arealonga, ante a dificultade para acceder á praia

Madrid, 28 de xuño de 2025. O deputado do BNG no Congreso, Néstor Rego, vén de rexistrar iniciativas na cámara baixa para demandar actuacións de mellora nos accesos ás praias do Vicedo. No concreto, Rego demanda mellorar os accesos xa existentes que actualmente se atopan en mal estado ou cubertos pola area, especialmente na de San Román, e instalar ramplas na praia de Arealonga para facilitar o acceso a persoas con mobilidade reducida.

A organización nacionalista aposta por combinar a preservación do medio coa dotación de servizos e o coidado dos accesos a prais como Arealonga, San Román e Abrela. Todas elas situadas no termo municipal do termo municipal do Vicedo. Este concello, explica o deputado nacionalista, posúe un litoral cunha grande riqueza e beleza natural, combinando fermosos cantís con praias de area fina e resgardadas.

“Un patrimonio natural que constitúe, ademais, un importante atractivo turístico e, por tanto, un motor económico para o municipio” reivindica o deputado nacionalista.

Ante a situación de abandono, Néstor Rego demanda actuacións de mellora nos accesos destas praias. No concreto, a praia de Arealonga solicita a instalación de ramplas que permitan salvar o desnivel de acceso desde os camiños até a area, ademais da mellora das propias sendas para acceder até a praia. “Este areal abrigado, de grande extensión, é unha zona de difícil acceso, en especial para persoas con mobilidade reducida” salienta o deputado nacionalista.

Así mesmo, no relativo á praia de San Román, que fica situada entre cantís, precisaríase a mellora e reparación da pasarela existente. “Os últimos invernos e os movementos de area fixeron que esta instalación quedara soterrada na súa grande maioría polo que son precisas actuacións que favorezan o acceso até a praia de forma segura” urxe Rego.

“Nunha situación semellante atópase a praia de Abrela, rodeada de dunas e cun paseo de madeira que precisa de reparación e melloras nas pasarelas de acceso que permitan atravesar o complexo de dunas” reclama.