Mariña Geuimunde, alcaldesa de Viveiro participou onte en Xixón na sinatura do acordo impulsado pola asociacion Northmarinas, no marco do proxecto “El Camino de Santiago a Vela”
Este protocolo, promovido pola asociación sen ánimo de lucro Northmarinas, ten como obxectivo reforzar a cooperación entre localidades costeiras da España Verde no marco do “Camiño de Santiago a Vela”, impulsando o desenvolvemento turístico sostible, a economía azul, o intercambio cultural e educativo, a promoción de actividades deportivas vinculadas ao mar, a creación de emprego no sector náutico e a visibilización da conexión histórica entre o mar e o Camiño.
A Travesía “Navega el Camino” chega a Viveiro o 20 de xuño
Unha das accións máis destacadas promovidas por Northmarinas é a travesía internacional “Navega el Camino”, que partiu de La Rochelle (Francia) o pasado 5 de xuño e rematará en Vilagarcía de Arousa o 1 de xullo, para culminar posteriormente en Santiago de Compostela.
Esta travesía fai escala en diferentes portos da costa norte de España e chegará a Viveiro o vindeiro venres 20 de xuño, procedente de Ribadeo. A expedición permanecerá na vila esa noite e continuará cara a Cedeira ao día seguinte.
Con motivo desta escala, o Concello de Viveiro recibirá oficialmente aos peregrinos participantes, organizando unha visita guiada á vila a cargo do Cronista Oficial, Carlos Nuevo Cal, e ofrecendo unha benvida institucional no Concello, como mostra de hospitalidade e apoio ao proxecto.
A alcaldesa de Viveiro, Mariña Gueimunde, destacou que “formar parte deste proxecto supón unha oportunidade para reforzar o papel de Viveiro como destino náutico e cultural, ao tempo que se dinamiza a economía local e se promove o coñecemento da nosa historia e patrimonio tan vencellados ao mar”.
Northmarinas, entidade impulsora do protocolo, leva promovendo desde 2016 o Camiño de Santiago por Mar, recoñecido pola Catedral de Santiago como ruta oficial de peregrinación, e que figura na Credencial Oficial do Peregrino.
Segundo datos da Oficina do Peregrino, nos últimos dez anos preto de 2.000 persoas realizaron esta ruta marítima, combinando navegación, turismo activo e espiritualidade, cun crecente interese tanto a nivel nacional como internacional