Site icon Crónica3.com A Mariña

O PP de Foz pide que non se suspenda o mercado do día 15 de xullo e que se celebre no Camiño Vello, como en anos anteriores

Os populares trasladan esta petición a instancia de numerosos veciños así como dos propios tendeiros e responsables dos postos ambulantes, que onte mesmo mostraron a súa preocupación e malestar por esta cancelación inesperada e sen alternativas

Foz, 9 de xullo de 2025. O Partido Popular de Foz solicita ao alcalde que reconsidere a súa decisión unilateral de suspender o mercado semanal previsto para o martes 15 de xullo, coincidindo coas vésperas da festividade do Carme, e propón que se celebre na zona do Camiño Vello, en Malates, como xa se fixo noutras ocasións.

Os populares trasladan esta petición a instancia de numerosos veciños, usuarias e usuarios habituais do mercado, así como dos propios tendeiros e responsables dos postos ambulantes, que onte mesmo mostraron a súa preocupación e malestar por esta cancelación inesperada e sen alternativas.

O PP considera incomprensible que se adoptase esta medida sen consensuar cos principais afectados. Trátase de comerciantes que levan todo o ano traballando baixo condicións complicadas, cun inverno longo e duro, e agora vense privados dunha xornada de traballo en pleno verán, unha época clave para a súa economía.

Desde o Partido Popular propoñen unha solución viable e xa empregada noutras ocasións: trasladar o mercado á zona do Camiño Vello, en Malates, onde se celebrou anteriormente con éxito. Trátase dunha rúa que se pode pechar durante a mañá do martes sen afectar o acceso ao porto, perfectamente garantido. A Policía Local xa está afeita a organizar o tráfico nesta zona e os propios vendedores ambulantes son quen de autoorganizarse.

“Non entendemos como se pode suspender un mercado sen dar alternativas e sen falar coa xente. Estamos a falar de moitos postos que viven disto e que levan meses agardando o verán para recuperarse dun inverno longo. O alcalde aínda está a tempo de rectificar e permitir que o mercado se celebre, por exemplo, no Camiño Vello, como se fixo outras veces con éxito”, manifesta o voceiro popular, Javier Castiñeira.

O PP de Foz insta a Cajoto a actuar con responsabilidade e a priorizar os intereses da veciñanza e dos propios comerciantes. “Non se pode gobernar de costas á xente”, engade Castiñeira.

Exit mobile version