Site icon Crónica3.com A Mariña

A Feira do Libro de Viveiro comeza este martes nos Xardíns de Noriega Varela

Desenvolverase ata o venres 15 de agosto e os visitantes terán un 10% de desconto nas compras das obras que escollan

Viveiro, 11 de agosto de 2025. Viveiro acollerá desde mañá unha nova edición da Feira do Libro . Terá lugar nos Xardíns de Noriega Varela, ata o venres 15, en horario de 12.00 a 14.00 e de 18.00 a 22.00 horas. A iniciativa forma parte do circuíto das Feiras do Libro de Galicia e conta coa colaboración da Xunta de Galicia, a Federación de Librarías de Galicia, a Deputación de Lugo e o Concello de Viveiro.

A cita reunirá librarías, editoriais e autores que ofrecerán ao público unha ampla variedade de títulos, ademais dun desconto do 10 % na compra dos libros. O lema desta edición é «Onde florecen os libros», e ao longo dos catro días nos que se desenvolverá, organizaranse sinaturas, presentacións e actividades culturais.

A alcaldesa Mariña Gueimunde, destacou a importancia desta cita para a dinamización cultural e social do Concello: «A Feira do Libro é un punto de encontro entre lectores, autores e profesionais do sector, e unha oportunidade para gozar da literatura ao aire libre nun entorno privilexiado como son os Xardíns de Noriega Varela».

A programación completa da Feira do Libro, cos horarios e actividades de cada xornada, pode consultarse na web librarias.org.

Exit mobile version