Continúan as actividades socioculturais deste mes de agosto no Vicedo con rutas, concurso e Xornadas da Memoria

O Vicedo, 18 de agosto, 2025. Continúan as actividades socioculturais deste mes de agosto cunha segunda edición da ruta guiada gratuita polo entorno de San Román, o mércores 20 ás 10h da mañá, onde se fará un pequeno roteiro pola zona da cruz, baixada á praia de San Román e as peculiaridades xeolóxicas desta praia e, para rematar, o entorno de Moutillós, onde apareceron indicios de presencia viquinga. Anotacións en rutasgalicianorte@gmail.com.

Ese mesmo día, mércores ás 20:30h terá lugar a entrega de premios e debate do Concurso de Fotografía turística do Vicedo, onde se van proxectar todas as fotografías participantes, cun pequeno debate en torno a todas elas. Aínda estase a tempo de participar entregando as fotografías antes do martes.

Ademais, a asociación Nordés organiza un ano máis as xornadas Memoria dun tempo, cun amplo programa de memoria histórica que inclúe charlas, proxeccións de documentais, presentacións, homenaxe na ponte e un recital na Casa da Cultura do Vicedo.