Entre os consumidores que mercaron nos establecementos destas localidades durante a iniciativa, sorteáronse un total de 1.000 euros, repartidos en 20 tarxetas prepago de 50 euros. Os gañadores recibiron esta mañá o seu premio, que deberán empregar en novas compras no comercio de proximidade local.
“Merca no teu comercio ten premio” é unha campaña de promoción e dinamización das vendas do comercio de proximidade dos municipios rurais organizada pola Federación de Comercio de Lugo, a Federación Galega de Comercio e a Xunta de Galicia, coa colaboración neste caso da Asociación de Comerciantes, Industriais e Autónomos de Burela e outras asociacións de comerciantes destas zonas de A Mariña.
Na entrega de premios participaron representantes das entidades organizadoras, entre eles, José María Seijas, presidente da Federación Galega de Comercio e da Federación de Comercio de Lugo; a súa homóloga en ACIA Burela, Eva Luaces; o director xeral de Comercio, Gabriel Alén; o primeiro tenente de Alcalde do Concello de Burela, Mario Pillado; así como outros directivos das asociacións empresariais e do Concello.
Durante o acto presentouse tamén a campaña número 7 de “Merca no teu Comercio” que na provincia de Lugo terá lugar entre o 1 e o 15 de setembro en Mondoñedo, Lourenzá e Barreiros.