A Romaría contará con actividades relixiosas, musicais, gastronómicas e infantís
O venres 22 celebrarase o Día do Polbo, co oficio relixioso ás 13.30 horas na capela do Campo da Festa e procesión, nunha xornada amenizada por unha charanga. O sábado 23 abrirán a verbena as orquestras Elebé e Pasión, mentres que o domingo 24 será a quenda de Los Supertop e Alcántara. O luns 25 actuarán Salsarena e Arizona, e o martes 26, Los Españoles e Conxuro. A programación pechará o mércores 27 co Día do Neno, que ofrecerá atraccións a prezos populares.
A alcaldesa Mariña Gueimunde subliñou que «o Naseiro é unha das festas máis queridas e recoñecidas de Galicia, unha cita que combina tradición, música e gastronomía, e que cada ano reúne milleiros de persoas arredor da amizade e da boa mesa».