O presidente do colectivo organizador, Álvaro Doural, fixo un balance “moi positivo. Creo que foi un acerto este programa: por unha parte o referido aos vehículos eléctricos tivo un peso importante nestes tres días de xornadas de traballo; por outra parte, o tema de internacionalización, coa participación do profesor de Colombia, o técnico de empresa de Lisboa (Portugal) e os profesores italianos de Brescia”.
Alvaro Doural destacou: “tivemos máis participantes que outros anos, a previsión que había incrementouse sensiblemente. E saíu ben porque se fai un traballo dun ano para outro, indo pouco a pouco durante todo o ano e isto é recoller o froito desa labor que se fixo, de contactos, de chamar a moitos sitios e todo ese tipo de cuestións necesarias para organizar un evento como este”.
Universidade africana
O presidente de Apaga considera que “a internacionalización é un tema que ten moita capacidade de incrementarse, hai moito potencial para poder facer cousas e continuamente van xurdindo outras opcións; por exemplo unha universidade africana, de Ghana, tamén está interesada en traballar con nós. Isto é gratificante para todos: para o profesorado, para o alumnado e para nós tamén, aínda que moitas veces eu teña a sensación de que isto que estamos facendo non importa moito na Mariña. Pero imos seguir aí mentres poidamos porque eu teño clarísimo que este é o camiño”.