Non se requiren coñecementos previos nin equipamento profesional, aínda que se recomenda dispoñer dun ordenador para aproveitar mellor as prácticas.
A materia, de carácter eminentemente práctico, permitirá ao alumnado gravar varios temas ao longo do ciclo, explorando todo o proceso creativo; dende a composición e os arranxos ata a gravación, mestura e mástering. Tamén se traballará con estacións de traballo de audio dixital (DAWs), síntese, sampling, programas de notación musical, protocolo MIDI e procesamento de sinais. O obxectivo é que cada proxecto persoal sexa motor da aprendizaxe e permita coñecer de primeira man as técnicas e ferramentas fundamentais da produción.
O encargado de impartir a asignatura será Adrián Arias Castiñeiras, quen acompañará ao alumnado neste percorrido formativo, accesible a persoas de todas as idades e formacións.
Ademais, a Escola Municipal de Música de Burela celebra esta semana as súas xornadas de portas abertas, ata o 19 de setembro, unha boa ocasión para coñecer de preto a nova oferta educativa.
As persoas interesadas poden solicitar máis información sobre inscricións, datas e horarios no correo escolademusica@burela.org ou nos teléfonos 982 580 720 e 982 879 483.