A presidenta da Asociación de Comerciantes, Industriais, Servizos e Autónomos de Ribadeo, Carmen Cruzado, subliñou que “a campaña arrincou o pasado 12 de setembro e prolongarase ata o 19 de outubro. O obxectivo pasa por potenciar as vendas neste período do ano tras o verán e coincidindo coa volta o cole. Os premios son moi interesantes e atractivos para a clientela do comercio, da hostalería e dos servizos de Ribadeo”.
Jesús Pérez, xerente de Acisa, indicou que “con este Rasca e Gaña tamén lle estamos dando as grazas á clientela de todo o ano, que segue confiando en nos e que seguen mercando en Ribadeo, a todas esas persoas que apostan polo noso comercio para facer as súas compras e ás que elixen a hostalería local para as súas celebracións ou para compartir momentos coas amizades”.
Son preto de 80 os locais que están presentes cos seus agasallos no Rasca e Gaña de Acisa Ribadeo. Os rascas están dispoñibles unicamente nos establecementos participantes, que se poden consultar nas redes sociais e web de Acisa.
O Rasca e Gaña está organizado por Acisa Ribadeo e co cofinanciamento da Xunta de Galicia.
Volta ao Cole
Acisa Ribadeo sumouse este ano á campaña Volta ao Cole – Bonos Deputación Lugo, posta en marcha pola Federación Galega de Comercio e a Deputación Provincial de Lugo, unha iniciativa que repartirá un total de 25.000 euros en premios entre a clientela que merque nos comercios de proximidade da provincia.
Ata 30 de setembro todas aquelas persoas que realicen as súas compras no comercio local poderán rexistrar o seu tícket a través da web https://www.bonosdeputacionlugo.com/voltacole para participar no sorteo de 90 tarxetas de 250 euros cada unha, así como dun premio extraordinario de 2.500 euros. O sorteo terá lugar o 2 de outubro de 2025.
Desde a directiva de Acisa animan “a aproveitar os días quedan ata finais de mes para participar nesta Volta ao Cole e poder obter a algún importante premio, que nas datas nas que estamos sempre será moi benvido”.