O documento foi remitido xa ao órgano ambiental competente
A alcaldesa Mariña Gueimunde explicou que «se teñen incorporado xa todas as modificacións e correccións propostas dende as diferentes administracións, tal e como recomendaban os diferentes informes sectoriais; e foron remitidas á Xunta de Galicia». Indicou tamén que, durante os últimos meses, se realizou «un traballo de fondo, de intercomunicación entre ambas administracións, para rectificar e puntualizar algunhas cuestións que non estaban ben».
Segundo detallou Mariña Gueimunde, o documento atópase agora no departamento de Medio Ambiente da Xunta, que debe elaborar a memoria ambiental. «Unha vez que se nos remita esa memoria, saberemos se o traballo destes meses serviu ou non, pero nós cremos que imos polo bo camiño. Esta é a fórmula de empurrar o PXOM e agardamos que, cando se nos remita esa memoria ambiental, sexa con todas as garantías para seguir avanzando cara á súa aprobación inicial», concluíu a rexedora.
Cronoloxía dos pasos dados polo equipo de Goberno de Viveiro
Xuño 2025
O 18 de xuño, o equipo redactor remite documentación actualizada do PXOM ao órgano ambiental, incluíndo unha proposta de memoria ambiental.
O 26 de xuño, envíase formalmente a proposta de memoria ambiental á Xunta.
Xullo 2025
O 14 de xullo, tras o requirimento do órgano ambiental, preséntase documentación corrixida.
O 18 de xullo, o Concello recibe a documentación corrixida.
Tramitación paralela (xullo–agosto 2025)
9 de xullo: traslado de anuncios de prensa e DOG para a aprobación inicial.
14 de xullo: solicitude de informes sectoriais, remitidos o 21 de xullo.
1 de agosto: nova solicitude de informes sectoriais, remitida o 12 de agosto.
Seguinte fase
Recibida a memoria ambiental polo Servizo de Avaliación Ambiental Estratéxica, a tramitación do PXOM seguirá adiante coa incorporación das modificacións.
A aprobación definitiva dependerá de se os cambios se consideran ou non unha modificación substancial da ordenación territorial.