Nesa primeira sesión, a formación afondou en aspectos a valorar na elección das ubicacións como os tipos de floración, a orientación ou a preparación do chan. O curso completarase mañá coa instalación dun apiario didáctico cuberto, que quedará como espazo de formación e investigación para apicultores da comarca e para o alumnado do centro educativo, no que se imparte un ciclo de xestión forestal e se desenvolven proxectos de educación ambiental como Rebinxe.
O curso forma parte do programa de formación en apicultura que a área de Rural ven desenvolvendo nos dous últimos anos da man da Casa do Mel, enfocados na ampliación e actualización de coñecementos das apicultoras e apicultores. Ademais de Mondoñedo, Barreiros, Cervantes, Vilalba e Pantón acolleron nos últimos meses estas actividades formativas.