O concerto contará coa participación do grupo de música tradicional O Arco da Vella
A actuación, ás 13.00 horas na pista da festa de San Miguel, coincide coa celebración das festas de San Miguel, un contexto elixido para achegar a música tradicional e en galego a todos os públicos.
O concerto contará coa participación do grupo de música tradicional O Arco da Vella, que acompañarán a Xabier Díaz e Adufeiras de Salitre nalgúns dos temas do repertorio, un repaso aos seus últimos catro discos – The Tambourine Man, Noró, As Catedrais silenciadas e Axúdame a sentir- que teñen a pandeireta como instrumento central.
O deputado de Mocidade Daniel García destacou que “o concerto pecha un ciclo de actuacións que promovemos desde a Vicepresidencia da Deputación para achegar a todos os públicos, máis aló dos circuítos de festivais e dos grandes eventos musicais, o gran momento que vive a nosa música da man de artistas como Xabier Díaz e Adufeiras de Salitre, que lle deron un novo pulo á tradición”
O responsable provincial destacou a necesidade de “fórmulas de colaboración entre institucións e tecido asociativo para que actuacións de grande formato como esta sexan posibles tamén nos concellos máis pequenos, facilitando o acceso a cultura en todo o territorio”.
A alcaldesa, Ana Ermida, sinalou que “será un orgullo acoller por primeira vez en Barreiros a Xabier Díaz e Adufeiras de Salitre, coas que nos sentimos especialmente conectadas polas raíces barreirenses dunha das súas compoñentes, Iria Penabad” e encadrou o concerto na “aposta do concello por seguir impulsando unha axenda cultural para todos os públicos que poña en valor os nosos sinais de identidade”
A actuación en San Miguel de Reinante completa o ciclo Polavilas no paraíso, tras os concertos de Samos e Castroverde.