Xosé Merelles enxalza o plan de sostibilidade turística da Mariña como unha oportunidade para impulsar o desenvolvemento da comarca

O director de Turismo de Galicia participou na inauguración dun Foro sobre turismo e sostibilidade na Mariña lucense

O Valadouro, 1 de outubro de 2025. O director de Turismo de Galicia, Xosé Merelles, participou na inauguración esta mañá o Foro de Turismo e Sostibilidade A Mariña Lucense no que puxo en valor instrumentos coma os Plans de Sostibilidade Turística en Destino (PSTD) para avanzar nun turismo sostible e na identificación do modelo que se quere potenciar na comunidade. Neste sentido, salientou precisamente o PSTD da Mariña Lucense, no que precisamente se enmarca o Foro que se celebra hoxe, e que conta cun investimento global de 2,3M€ dos que a Xunta financia 1M€.

O director de Turismo destacou que “o obxectivo deste plan é impulsar un desenvolvemento turístico sostible na Mariña Lucense, poñendo en valor o seu patrimonio cultural e natural protexido para frear a perda demográfica nas áreas rurais dos 16 municipios”.

Ademais, persegue a xestión dos fluxos turísticos no territorio, o freo da perda de poboación rural, aumentar o seu nivel socioeconómico e mellorar o equilibrio territorial neste territorio. O impulso da dixitalización das infraestruturas e os servizos turísticos existentes é outro dos eixos deste PSTD, xunto co desenvolvemento de equipamentos e produtos turísticos seguros, innovadores e singulares.

“Desde o Goberno galego levamos anos asumindo o compromiso de traballar da man da sostibilidade turística”, salientou Merelles, quen destacou o esforzo que realiza a administración “para repartir a actividade turística polo territorio e durante todos os meses do ano”.

O director da Axencia citou algunha das ferramentas que se empregan para potenciar estes aspectos, como os Plans de Sustentabilidade Turística en Destino e lembrou outras achegas económicas que apoian a sustentabilidade, como as axudas para a mellora de infraestruturas turísticas en concellos de menos de 10.000 habitantes, dotadas con 2M€, ou as liñas para actuacións de melloras enerxéticas, dixitalización e embelecemento de fachadas de establecementos situados no litoral costeiro, ás que se destinan 5M€.

Entre os meses de xaneiro e xullo, a Mariña Lucense recibiu a visita de máis de 103.000 turistas, un 1,8% máis que no mesmo período de 2024, que realizaron un total de 205.000 pernoctacións, un 8,1% máis.